नमामि दूतं रामस्य सुखदं च सुरद्रुमम् | पीनवृत्त महाबाहुं सर्वशत्रु निवारणम् ||1|| नानारत्न समायुक्त कुंडलादि विराजितम् | सर्वदाऽभीष्टदातारं सतां वै दृढमाहवे ||2|| वासिनं चक्रतीर्थस्य दक्षिणस्थगिरौ सदा | तुंगांबोधि तरंगस्य वातेन परिशोभिते ||3|| नाना देशागतैः सद्भिः सेव्यमानं नृपोत्तमैः | धूपदीपादि नैवेद्यैः पंचखाद्यैश्च शक्तितः || 4 || भजामि श्रीहनूमंतं हेमकांति समप्रभम् | व्यासतीर्थ यतींद्रेण पूजितं प्रणिधानतः ||5|| त्रिवारं यः पठेन्नित्यं स्तोत्रं भक्त्याद्विजोत्तमः | वांछितं लभतेऽभीष्टं षण्मासाभ्यंतरे खलु ||6|| पुत्रार्थी लभते पुत्रं यशोऽर्थी लभते यशः| विद्यार्थी लभते विद्यां धनार्थी लभते धनम् ||7|| सर्वथा माऽस्तु संदेहो हरिः साक्षी जगत्पतिः | यः करोत्यत्र संदेहं स याति नरकं ध्रुवम् ||8||
इति श्री व्यासरायरु रचिसिद श्री यंत्रोद्धारक हनुमत् स्तोत्रं संपूर्णं || श्री कृष्णार्पणमस्तु ||