హేమాద్రి-శిఖరాకారం శుద్ధ-స్ಫటిక-సన్నిభమ్ | పూర్ణచంద్ర-నిభం దేవం ద్విభుజం వామనం స్మరేత్ || ౧ ||
పద్మాసనస్థం దేవేశం చంద్రమండల-మధ్యగమ్ | జ్వలత్కాలానల-ప్రఖ్యం తటిత్కోటి-సమప్రభమ్ || ౨ ||
సూర్యకోటి-ప్రతీకాశం చంద్రకోటి-సుశీతలమ్ | చంద్రమండల-మధ్యస్థం విష్ణుమచ్యుతమవ్యయమ్ || ౩ ||
శ్రీవత్స-కౌస్తుభోరస్కం దివ్యరత్న-విభూషితమ్ | పీతాంబరధరం దేవం వనమాలా-విభూషితమ్ || ౪ ||
సుందరం పుండరీకాక్షం కిరీటేన విరాజితమ్ | షోడశస్త్రీపరివృతమ్-అప్సరోగణ-సేవితమ్ || ౫ ||
సనకాదిభిరన్యైశ్చ స్తూయమానం సమంతతః | ఋగ్యజుస్సామాథర్వాభిర్-గీయమానం జనార్దనమ్ || ౬ ||
చతుర్ముఖాద్యైర్దేవేశైః స్తోత్రారాధన-తత్పరైః | త్రియంబకో మహాదేవో నృత్యతే యస్య సన్నిధౌ || ౭ ||
దధిమిశ్రాన్నకవలం రుగ్మపాత్రం చ దక్షిణే | కరేఽపి చింతయేద్వామే పీయూషమమలం సుధీః || ౮ ||
సాధకానాం ప్రయచ్ఛంతమన్నపానమనుత్తమమ్ | బ్రాహ్మే ముహూర్తే చోత్థాయ ధ్యాయేద్దేవమధోక్షజమ్ | ఆయురారోగ్యమైశ్వర్యం లభతే చాన్నసంపదమ్ || ౯ ||
అతిసువిమలగాత్రం రుగ్మపాత్రస్థమన్నం సులలితదధిఖంఢం పాణినా దక్షిణేన | కలశమమృతపూర్ణం వామహస్తే దధానం తరతి సకలదుఃఖాద్వామనం భావయేద్యః || ౧౦ ||
ఇదం స్తోత్రం పఠేద్యస్తు ప్రాతఃకాలే ద్విజోత్తమః | అక్లేశాదన్నసిద్ధ్యర్థం జ్ఞానసిద్ధ్యర్థమేవ చ || ౧౧ ||
అభ్రశ్యామః శుభ్రయజ్ఞోపవీతీ సత్కౌపీనః పీత-కృష్ణాజినశ్రీః | ఛత్రీ దండీ పుండరీకాయతాక్షః పాయాద్దేవో వామనో బ్రహ్మచారీ || ౧౨ ||
అజినదండ-కమండలు-మేఖలా-రుచిర-పావన-వామన-మూర్తయే | మితజగత్త్రితయాయ జితారయే నిగమవాక్పటవే వటవే నమః || ౧౩ ||
శ్రీభూమిసహితం దివ్యం ముక్తాహార-విభూషితమ్ | నమామి వామనం దేవం భుక్తిముక్తి-వరప్రదమ్ || ౧౪ ||
వామనో బుద్ధిదాతా చ ద్రవ్యస్థో వామనః స్మృతః | వామనస్తారకోభాభ్యాం వామనాయ నమో నమః || ౧౫ ||
|| ఇతి శ్రీవామనపురాణే దధివామనస్తోత్రం సంపూర్ణమ్ ||