ఓం లౌకికవైదిక భేదభిన్నవర్ణాత్మక ధ్వన్యాత్మక అశేషశబ్దార్థ ఋగాదిసర్వేవేదార్థ విష్ణుమంత్రార్థ పురుషసూక్తార్థ గాయత్ర్యర్థ శ్రీమన్నారాయణాష్టాక్షరమంత్రార్థ వాసుదేవద్వాదశాక్షరమంత్రా౦తర్గతాంత్య చతురక్షరార్థ వ్యాహృత్యర్థ మాతృకామంత్రార్థ ప్రణవోపాసకానాం పాపావిద్ధ దైత్యపూగావిద్ధ శ్రీవిష్ణుభక్త్యాద్యనంతగుణపరిపూర్ణ రమావ్యతిరిక్త పూర్వప్రసిద్ధవ్యతిరిక్త అనంతవేదప్రతిపాద్యముఖ్యతమా అనంతజీవనియామక అనంతరూపభగవత్కార్యసాధక పరమదయాళు క్షమాసముద్ర భక్తవత్సల భక్తాపరాధసహిష్ణు శ్రీముఖ్యప్రాణావాతారభూతానాం ఆజ్ఞ జ్ఞానార్థి జ్ఞానయోగ్య భగవత్కృపాపాత్రభూత సల్లోలోకకృపాలు బ్రహ్మరుద్రాద్యర్థిత భగవదాజ్ఞాం శిరసి పరమాదరేణ అనర్ఘ్యశిరోరత్నవన్నిధాయ తథాశేష దేవతాప్రార్థనానాం హారవద్ద్హ్రుధి నిధాయ సర్వస్వకీయసజ్జనానుగ్రహేచ్ఛయా కర్మభువ్యవతీర్ణానాం తథావతీర్య సకలసచ్చాస్త్రకర్తృణాం సకలదుర్మతభంజకానాం అనాదితః సత్సంప్రదాయపరంపరాప్రాప్త శ్రీమద్వైష్ణవసిద్ధాంతప్రతిష్ఠాపకానాం అత ఏవ భగవత్పరమానుగ్రహ పాత్రభూతానాం సర్వదా భగవదాజ్ఞయా భగవత్సన్నిధౌ పూజ్యానాం తథా భగవతా దత్తవరాణాం ద్వాత్రింశల్లక్షణోపేతానాం తథా సమగ్రగురులక్షణోపేతానాం అసంశయానాం ప్రసాదమాత్రేణ స్వభక్తాశేషసంశయచ్చేత్రూణాం ప్రణవాద్యశేష వైష్ణవమంత్రోద్ధారకాణాం సర్వదా సర్వవైష్ణవ మంత్రజ్ఞాపకానాం సంసిద్ధసప్తకోటిమహామంత్రాణాం భగవతి భక్త్యతిశయేన భగవదుపాసనార్థం స్వేచ్చయా గృహీతరూపాణాం తత్ర తత్ర పృథక్ పృథక్ భగవతోననంతరూపేషు పృథక్ పృథగ్వేదోక్త తదనుక్త భారతోక్త తదనుక్త సంప్రదాయాగత స్వేతర స్వాభిన్నతయాప్యశేషశక్తివిశేషాభ్యాం పృథగ్వ్యవహార విషయ సర్వసామర్థ్యోపేత నిరవధికానంత అనవద్య కల్యాణగుణపరిపూర్ణ అనంతగుణోపసంహతృణాం తథా వేదోక్త సర్వక్రియోపసంహతృణాం ఏవం అనంతరూపా అవయవగుణ క్రియాజాత్యవస్థావిశిష్ట భగవదుపాసకానాం పరమదయాళూనాం క్షమాసముద్రాణాం భక్తవత్సలానాం భక్తాపరాధసహిష్ణూనాం స్వభక్తాన్ దుర్మార్గాత్ ఉద్ద్హ్రుత్య సన్మార్గస్థాపకానాం స్వభక్తం మాముద్దిశ్య భగవతః పురః పరమదయాళో క్షమాసముద్ర భక్తవత్సల భక్తాపరాధసహిష్ణో త్వదధీనం దీనం దూనం అనాథం శరణాగతమనేనముద్ధరేతి విజ్ఞాపనకర్తృణాం సర్వజ్ఞశిరోమణీనాం అశేషగుర్వంతర్యామిణాం సదాభగవత్పరాణాం భగవతోన్యత్ర సర్వవస్తుషు మనఃసంఘరహితానాం సర్వత్ర సర్వదా సర్వాకార సర్వాధార సర్వాశ్రయ సర్వోత్పాదక సర్వపాలక సర్వసంహారక సర్వనియామక సర్వప్రేరక సర్వప్రవర్తక సర్వనివర్తక యథాయోగ్యం సర్వజ్ఞానాజ్ఞానబంధమోక్షప్రద సర్వసత్తాప్రద సర్వశభ్ధవాచ్య సర్వశబ్ధప్రవృత్తినిమిత్త సర్వగుణాతిపరిపూర్ణముఖ్యతమ సర్వదోషాతిదూర సర్వాచింత్య సర్వోత్తమ సర్వేశ్వర సర్వాత్యంతవిలక్షణ స్వగతభేదవివర్జితత్వాదినా భగవద్రష్ప్రూణాం అభిమానాది సర్వదోషదూరాణాం అసూయేర్ష్యాది అశేష మనోదోషనివర్తకాం నిత్యాపరోక్షీకృత రమాయుక్త అశేషభగవద్రూపాణాం అత ఏవ విలీనాశేష ప్రకృతిబంధానాం అథ ఏవ దూరోత్సారిత అశేష అనిష్టానాం అథ ఏవ అశేషభక్తాశేషానిష్ఠ నివర్తకానాం ప్రణవోపాసకానాం అస్మదాదిగురూణాం శ్రీమదానందతీర్థ శ్రీమచ్చరణానాం అంతర్యామిన్ అనిరుద్ధ ప్రద్యుమ్న సంకర్షణ వాసుదేవాత్మక శ్రీమధ్వవల్లభ శ్రీలక్ష్మీవేదవ్యాసాత్మక అండస్థిత అనంతరూపావయవ గుణక్రియా జాత్యవస్థావిశిష్ట రమాయుక్త క్షీరాబ్ధి శేషశాయి శ్రీపద్మనాభాత్మక అండా౦డహిరభివ్యక్త శుద్ధసృష్టిత్వేనాభిమత శ్రీచతుర్ముఖ ముఖ్యప్రాణోపాస్యత్వాది అనేకప్రయోజనక అనంతానంతరూప మూలభూత తథాశేష జగత్పాలనప్రయోజనక శాంతిపతి అనిరుద్ధ మూలభూతాశేష జగత్సృష్టిప్రయోజనక కృతిపతి ప్రద్యుమ్న మూలభూత జగత్సంహారప్రయోజనక జయాపతి సంకర్షణ మూలభూత తథాస్వస్వ సమగ్రయోగ్యతాభిజ్ఞ పరమానుగ్రహశీల భగవత్ప్రేరిత చతుర్ముఖాది సద్గురూపదిష్ట స్వస్వయోగ్య భగవద్రూప గుణోపాసనయా సంజాత స్వస్వయోగ్య భగవద్రూప విశేషదర్శనభోగాభ్యాం వినిష్టానిష్ట సంజాత ప్రారబ్ధలక్షణ అశేషకర్మాణాం స్వస్వయోగ్యతానుసారేణ సంపూర్ణసాధనానాం పూర్వకల్పేబ్రహ్మణా సహ విరజానదీస్నానేన త్యక్తలింగానాం తథా వినష్టావశిష్టేష్ట అశేష ప్రారబ్ధకర్మాణాం ప్రలయకాలే భగవదుదరే వసతాం అనంతమాత్రవపుషాం తదనుభవరహితానాం స్వస్వయోగ్య భగవద్రూప విశేషధ్యానరతానాం సృష్టికాలే భగవదాజ్ఞయా భగవదుదరాద్బహిర్నిర్గతానాం శ్రీశ్వేతద్వీపదర్శనం నిమిత్తీకృత్య ప్రధానావరణభూతస్వేచ్చాపసరణేన స్వస్వయోగ్య ఆనందవిర్భావలక్షణ ముక్తిప్రధానప్రయోజనక మాయాపతి శ్రీవాసుదేవాత్మక లక్ష్యాత్మక ప్రలయాబ్ధిస్థ శ్రీవటపత్రశాయ్యాశేషజగదుదర అశేషముక్త నాభిదేశోర్ధ్వభాగ కుక్ష్యాఖ్యదేశ త్రివిధాశేషసంసారి నాభిదేశాఖిలతమఃపతిత నాభ్యధోభాగదేశ శ్రీభూమ్యాలింగిత కాలాదిచేష్టక పరమాణ్వాది అశేషకాలావయవ సృష్ట్యాదికర్తృశేషనామక పరమపురుషనామక శ్రీచతుర్ముఖ ముఖ్యప్రాణోపాసితచరణ అనిరుద్ధాదిచతూరూపాత్మక గాయత్రీనామక సవితృనామక రూపవిశేషాత్మక వ్యాప్తరూప బృహచ్చరీర శూన్యాభిద కాలాభిద కేవలాభిద బ్రహ్మాభిద అనంతాభిద రూపవిశేషాత్మక నిరుపచరిత మూలరూపనిరుపచరిత వ్యాప్తప్రతిపాద్య అనంతతేజః పుంజితాదృశ రమాయుక్తరూపవిశేషాత్మక గాయత్రీభూతవాక్ పృథివీశరీరహృదయభేదేన షడ్విధగాయత్రీనామక లోకవేదసమీర రమాంతర్గత ప్రణవాఖ్యతురీయపాదోపేత గాయత్రీపాదచతుష్టయప్రతిపాద్య వైకుంఠస్థిత అనంతాసనస్థిత శ్వేతద్వీపస్థిత సర్వజీవస్థిత రూపభేదేన చతూరూపాత్మక నిరుపచరిత సర్వవాగర్థప్రతిపాదక శ్రీదేవ్యాది రమారూపాష్టక అభిమన్యమాన చక్రశంఖవరాభయయుక్తహస్తచతుష్టయోపేత ప్రదీపవర్ణ సర్వాభరణభూషిత విశ్వాదిభగవద్రూపాష్టక ప్రతిపాదక అకారాద్యష్టాక్షరాత్మక శ్రీమద్ప్రణవాద్యష్టమహామంత్ర ప్రతిపాద్యష్టరూపాత్మక మంత్రాధ్యాయోక్త భూవరాహాద్యశేష వైష్ణవమంత్రప్రతిపాద్య భూవరాహాద్యశేషరూపవిశేషాత్మక రమాదిమంత్రప్రతిపాద్య రమాదినిష్ఠ రమాదినామకరూప విశేషాత్మక శ్రీలక్ష్మీనృసింహాత్మక పరమదయాళో క్షమాసముద్ర భక్తవత్సల భక్తాపరాధసహిష్ణో దేశకాలాధిపతే దేహే౦ద్రియాపతే సూర్యవంశధ్వజ రఘుకులతిలక లక్ష్మణ భరత శత్రుఘ్నాగ్రజ శ్రీమద్ హనుమదుపాసితచరణ సీతాపతే శ్రీరామచంద్ర త్వదాజ్ఞయా త్వత్ప్రసాదాత్ త్వత్ప్రేరణయా త్వత్ప్రీత్యర్థం త్వాముద్దిశ్య త్వామనుస్మరన్నేవ త్వదాజ్ఞయా నియతేన మన్నియామకేన సత్తాప్రదవాయునామక చేష్టాప్రదప్రాణనామక ధారణప్రదధర్మనామక ముక్తిప్రదభక్తినామక రూపవిశేషై: మద్ధృధిస్థితేన పరమదయాలునా క్షమాసముద్రేణ భక్తవత్సలేన భక్తాపరాధసహిష్ణునా సర్వస్వామినా సర్వప్రేరకేణ సర్వతాత్వికదేవతాప్రేరకేణ సర్వతాత్వికసురభంజకేన తథా తత్ప్రేరణాప్రయుక్తాశేష దుర్మతభంజకేన అత ఏవ ప్రభంజనశబ్దవాచ్యేన ప్రతిదినం ప్రతిక్షణం బుద్ధిశోధకేన సర్వకర్మకర్త్రా సర్వకర్మకారయిత్రా సర్వకర్మస్వామినా సర్వకర్మసమర్పకేణ సర్వకర్మಫలభోక్త్రా సర్వకర్మಫలభోజయిత్రా సర్వకర్మప్రేరకేణ సర్వకర్మోద్భోదకేన సర్వకర్మశుద్ధిప్రదేన సర్వకర్మసిద్ధిప్రదేన సర్వకర్మనిష్టేన సర్వకర్మసాక్షిణా సర్వకర్మనిష్టభగవద్రూపోపాసకేన అథ ఏవ అశేషజీవని:సంఘౌనాదికాలీన ధర్మాధర్మ ద్రష్ట్రు స్వేచ్ఛయోద్భోదకేన తద్వాచక కపిలోపాసకేన రమావ్యతిరిక్త పూర్వప్రసిద్ధవ్యతిరిక్త అనంతవేదప్రతిపాద్యముఖ్యతమేన అనంతగుణపరిపూర్ణేన సర్వదోషదూరేణ త్వచ్చిత్తాభిజ్ఞ్నేన త్వచ్చిత్తానుసారిచిత్తేన త్వత్పరమానుగ్రహపాత్రభూతేన మద్యోగ్యతాభిజ్ఞ్నేన శ్రీభారతీరమణేన రుద్రాద్యశేషతాత్వికదేవతోపాసిత చరణేన మమ సర్వాస్వవస్థాసు చిత్రధా విచిత్రధా త్వదుపాసకేన శ్రీముఖ్యప్రాణేన ప్రేరితఃసన్ త్వత్సంస్మృతిపూర్వకం శయనాత్ సముత్థాయద్యతనం స్వవర్ణాశ్రమోచితం దేశ కాల అవస్థోచితం నిత్య నైమిత్తక కామ్యభేదేన త్రివిధం త్వత్పూజాత్మకం కర్మ యథాశక్తి యథాజ్ఞప్తి యథావైభవం కరిష్యే మదాజ్ఞాకారిభి: విద్యాసంబంధిభి: దేహసంబంధిశ్చ త్వదీయై: అశేషజనై: త్వత్సర్వకర్మకర్తృత్వ కారయితృత్వాది అనుసంధానపూర్వకం కారయిష్యే చ ।।
।।ఇతి శ్రీ రాఘవేంద్రాఖ్యయతినా కృతమంజసా ప్రాతఃసంకల్పగద్యం స్యాత్ ప్రీత్యై మాధవమధ్వయో:।।